సర్దార్జీ జోకులు – నిజంవి – నవ్వురావు

1. నేను లండన్ వెళ్ళిన కొత్తలో మా టీములో ఒక సర్దార్జీ ఉండేవాడు. అతన్ని కొంచం ఆటపట్టించేవాళ్ళం. అతనూ సరదాగానే తీసుకునేవాడు. ఓసారి అతను ఆఫీసుకి వచ్చేసరికి అతని డెస్కు దగ్గర ఎవరో పూల బొకే ఉంచారు. ఎవరో అతనికి అర్థం కాలేదు. మా టీము వాళ్ళు అతని డెస్కు దగ్గరకి వెళ్ళి ‘ఎవరు బాసూ నీకు బొకే పంపింది’ అని అడిగారు. ‘ఎవరంటారు? ఆండ్రూనా?’ అన్నాడు చటుక్కున. ‘ఆండ్రూ నీకు పూలెందుకు పంపుతాడు?’ అని అందరూ గొల్లున నవ్వారు. (ఆండ్రూ మా కొలీగే – వేరే టీము. మామూలు వ్యక్తే, ఏ ‘ప్రత్యేకతా’ లేదు.) ఈలోగా సర్దార్జీకి ఫోన్ వచ్చింది. వాళ్ళావిడ ఫోన్లో విషెస్ చెప్పింది. పూలు పంపించింది ఆవిడే. ఆ తర్వాత మావాళ్ళు అతన్ని గట్టిగానే ఏడిపించారు. ‘ఏక్ ఫూల్ దో మాలీ, ఆండ్రూ ఓమాలీ’ అని చెప్పి. (ఆండ్రూ పూర్తి పేరు ఆండ్రూ ఓమాలీ.)

2. ఓసారి మా టీము అంతా కొంచం లేటయ్యేవరకూ ఆఫీసులో పని చేశాం. పనయ్యాకా అందరం కలిసే వెళ్ళేవాళ్ళం. ఆరోజు లేటయ్యిందని అందరం తొందర తొందరగా లిఫ్టు దగ్గరకి వెళ్ళాం. వీలైనంతమంది లిఫ్టులోకి దూరాం. లిఫ్టు నిండిపోయింది. ఈ సర్దార్జీ, ఇంకా ఒకళ్ళిద్దరు బయట ఉండిపోయారు. మా ఫ్రెండొకతను, ‘పరవాలేదు, మీరు కూడా రండి. ఎక్కువమంది అయితే లిఫ్టు తొందరగా కిందకి వెళ్తుంది’ అన్నాడు. అప్పుడు సర్దార్జీ, ‘I thought I was the only Sardar in the team’ అన్నాడు. అందరం గొల్లున నవ్వాం.

3. నేను సర్దార్జీ అని పేరుపెట్టిన ఒక వ్యక్తి నన్నడిగిన ప్రశ్న, ‘మీకు యూకే వెళ్ళడానికి లగేజీ 28 కేజీలే ఎలౌ చేస్తారు కదా, మరి యూ ఎస్ కి అరవై కేజీలు ఎందుకు ఇస్తారు?’. అందుకు నేను చెప్పిన సమాధానం – ‘యూకే చాలా చిన్న దేశం. అందులో ఎక్కువ సామాను పట్టదు. యూ ఎస్ పెద్ద దేశం కదా వాళ్ళకి బోల్డంత ప్లేసు ఉంది, అందుకే వాళ్ళకి అరవై కేజీలు అని’. (నాకు తప్ప ఎవరికీ నవ్వు రాకపోయినా అందరికీ నవ్వక తప్పలేదు, ఇంటల్లుణ్ణి కదా )