అవతార్ సినిమాలో రంధ్రాలు

చట్టబద్ధమైన హెచ్చరిక – అవతార్ సినిమా అభిమానులు ఈ టపాని చదవనవసరం లేదు.

—

అవతార్ ఒక అద్భుతం. అందులో సందేహం లేదు.

నేను ఈ జన్మలో క్రియేటివ్ గా ఏమీ రాయలేను. అందులోనూ సందేహం లేదని అవతార్ చూశాక నాకు ధ్రువపడింది. ఎందుకంటే అంత అద్భుతమైన సినిమాలోనూ నాకు భరించలేనంత పెద్ద పెద్ద రంధ్రాలు కనిపించాయి కాబట్టి.

కానీ అంత పెద్ద స్టేట్ మెంటు అవసరం లేదు లెండి. ఎందుకంటే అవతార్ ఒక పిల్లల సినిమా. బుర్ర పెట్టి చూడ్డానికి తీసింది కాదు. ఎవరో ఈమధ్య దేనిగురించో అన్నారు, ‘అర్థం చేసుకోకూడదు, అనుభవించాలి’ అని. కానీ ఆ సంగతి సినిమా అయ్యేదాకా నాకు పూర్తిగా వెలగలేదు. ఓ అరగంట సినిమా అయ్యాకా మాత్రం కొద్దిగా తెలిసింది, ఇది బుర్ర పెట్టి చూసే సినిమా కాదులే అని. కాబట్టి ఓ పక్క సినిమాని ఎంజాయ్ చేస్తూనే మరో పక్క దాంట్లోని రంధ్రాల్ని లెక్కపెడుతూ నవ్వుకుంటూనే ఉన్నాను. ఈ సినిమాకి ఆస్కార్ ఇవ్వకపోవడం చాలా సమంజసమే అని కూడా ఆఖర్న అనిపించింది.

ఈ సినిమా గురించి కొన్ని ఆలోచనలు.

* ఇది వరకు చానల్ 4 లో అనుకుంటా ఒక డాక్యుమెంటరీ వచ్చింది. (డిస్కవరీ చానల్ వాళ్ళు తీసిన, Alien Planet, కావచ్చు బహుశా). భూమిని పోలిన కొన్ని ఇతర గ్రహాలనీ, వాటి మీద ఉండే వైవిధ్యభరితమైన భౌతిక పరిస్థితుల్నీ ఊహించి, ఆ పరిస్థితులకి అనుగుణంగా పరిణామం చెందే జీవరాసులు ఎలా ఉండచ్చు అన్న ఊహకి రూపకల్పన చేస్తారు ఆ డాక్యుమెంటరీలో. గాలిలో తేలియాడే తిమింగలాల్లాంటి జీవులు, విచిత్రమైన చెట్లూ ఇంకా అనేక వింతలతో చాలా ఆసక్తికరంగా ఉంటుంది ఆ డాక్యుమెంటరీ. అందులో చూసిన కొన్ని భాగాలు ఇంకా గ్రాండ్ స్కేల్లో చూస్తున్నట్టనిపించింది అవతార్ చూస్తుంటే.

* అలాగే అమెజాన్ అడవుల్లో అతి పురాతనమైన తెగవాళ్ళు జీవిస్తున్నట్టు, వాళ్ళ ఫొటోలతో సహా న్యూస్ వచ్చింది కొన్నేళ్ళ క్రితం. http://www.guardian.co.uk/world/2008/may/30/brazil.conservation. అవతార్ చూస్తుంటే ఇది కూడా గుర్తొచ్చింది.

* ఈ సినిమా కథ విషయంలో మొదట ఫార్ములాకి డిసైడయ్యి, ఆ తర్వాత దాని చుట్టూ కథ అల్లుకున్నారని నాకు గట్టిగా అనిపించింది. మరీ రొడ్డకొట్టుడు ఫార్ములా కాదు కానీ, వెస్టర్న్ పబ్లిక్ సెంటిమెంట్లని చక్కగా వండి, వార్చి, వడ్డించిన కథ. ఇందులో స్టీరియో టైప్ కేరెక్టర్లని, ముఖ్యంగా స్టీరియోటైప్ అన్న పదానికి నిర్వచనంలా ఉన్న విలన్ గాణ్ణి చూస్తే ఒళ్ళు మండింది.

* జేమ్స్ కెమరూన్ లాంటి డైరెక్టర్లు సైన్సు ఫిక్షన్లో పుట్టి పెరిగారు, నిజమే. కాని వాళ్ళు నిజం సైన్సు పుస్తకాలు జీవితంలో ఒకటైనా చదివి ఉంటారా అని గట్టి సందేహం కలిగింది. (నేనేదో పెద్ద చదివేశానని కాదు లెండి). ఎందుకంటే నాకు బాగా కడుపులో తిప్పేసిన విషయం ఒకటుంది ఇందులో. ఒకటి కాదు, ఛా……లా…. ఉన్నాయి, మచ్చుకి ఒకటి. ఈ పండోరా గ్రహం మీద జీవులకి తోకలుంటాయి. ఆ తోకలకి USB Drives ఉంటాయి – బయొలాజికల్ డ్రైవులే లెండి. హీరోగాడు తోక విప్పి తన డ్రైవు ఓపెన్ చేస్తాడు. ముళ్ళు ముళ్ళులా ఉంటుంది. దాన్ని తీసుకెళ్ళి తాను మచ్చిక చేసుకోవాల్సిన గుర్రం తోకకి ఉన్న డ్రైవుకి తగిలిస్తాడు. అంతే, ఆ పళంగా ఇద్దరికీ ఒక bond ఏర్పడిపోయి ఆ గుర్రం వీడికి మచ్చికైపోతుంది. మరి ఈ జీవులకి ఇటువంటి adaptations ఎలా ఇవాల్వ్ అయ్యాయో, ఎందుకు అయ్యాయో, వాటి survival value ఏమిటో మనకి అర్థం కాదు. గుర్రాలకీ, ఎగిరే డైనోసార్లకీ ఈ డ్రైవులు ఎందుకు ఉన్నాయిరా అంటే ఈ నావీ గాళ్ళ చేత మచ్చిక చేయించుకోడానికే అన్నమాట. అది చూశాకా Richard Dawkins రాసిన The Blind Watchmaker పుస్తకంలో డార్విన్ చెప్పిన మాటలు గుర్తొచ్చి ఏడుపొచ్చింది – ‘If horses ever develop saddles, it immediately falsifies my theory of natural selection’. (ఇవే మాటలు కాదు, ఇంచుమించుగా ఇలాగే అంటాడు). ఈ వాక్యం మీకు అర్థం కాకపోతే మీరు తప్పకుండా The Blind Watchmaker పుస్తకం చదవాల్సిందే. (Jesus Loves You అన్నట్టుగా నేను Darwin Loves You, Read this book అంటున్నాను – సిగ్గు లేకుండా).

* ఈ సినిమాలో నావీ గాళ్ళందరూ నీలమేఘశ్యాములు, ఆజానుబాహులు, అరవింద దళాయతాక్షులు, పీన వక్షులు, తనుమధ్యులు – వీళ్ళ అద్రుష్టం కూలా, ఒక్కళ్ళకీ జిమ్ముకెళ్ళాల్సిన పని లేదు. బానపొట్టలు కలికానిక్కూడా కనబడవ్.

* సినిమాలో హీరో గాడూ, వాడి అవతారం – ఒకడు పడుకుంటేనే మరోడు లేస్తాడు. ఒకే ఆత్మ వాళ్ళోకీ, వీళ్ళోకీ దూరుతూ ఉంటుంది అనుకోవాలి మనం. పరకాయ ప్రవేశం అన్నమాట. హీరో గాడి మెదడులోని డేటాని అవతారం మెదడులోకి కాపీ చేశాక ఇద్దరూ వేర్వేరు వ్యక్తులు అవుతారు కానీ ఒకడు పడుకుంటే మరోడు లేవడమేంటి? లేకపోతే అవతార్ మెదడులో హార్డ్ డిస్కు లేదా? RAM ఒకటే ఉందా? వీడు పడుకుంటే, వీడి బ్రెయిన్ సెర్వర్ లాగా అవతార్ మెదడు workstation లాగా పనిచెయ్యాలా? వీళ్ళు స్విచ్చాపేస్తే అవతార్ గాడి మెదడు పడుకుంటుందా? స్విచ్చాపేస్తే ఆగిపోవాలి కానీ పడుకోడమేంటీ? అసలీ కథ రాసినవాడికి మెదడుందా? ఒక వాక్యం రాయాలంటేనే ఎవడేమనుకుంటాడో అని మథనపడిపోతాం కదా (నేను), మరి ఇంత ఘోరమైన తప్పులు సినిమాలుగా తీసేస్తే జనాలు నవ్వుకుంటారని వాళ్ళకి అనిపించదేమో!! అందుకే అనుకుంటాను నాలాంటి వాళ్ళు ఎప్పటికీ క్రియేటివ్ రైటర్సు కాలేరని.

* సినిమాలో కెల్లా చెత్తాతి చెత్త – క్లైమాక్సు. ఎకనామిక్సు గురించి గానీ, మిలటరీ గురించి గానీ, పోలిటిక్సు గురించి గానీ, అసలు బేసిగ్గా మనుషులు, మనుషుల్లాంటివాళ్ళు ఎలా ప్రవర్తిస్తారో కొద్దిపాటి అయిడియా కూడా లేని పసివాళ్ళు మాత్రమే ఎంజాయ్ చెయ్యగల క్లైమాక్సు. Of course, technically it is a marvel.

* ఇంక మిగతా సినిమా అంతా ‘New Age Crap’. క్షమించాలి, నేను మామూలుగా ఇంత సినికల్ గా ఉండను. కానీ అద్భుతమైన సినిమా చూసిన అనుభూతి ఒకవైపు, వెర్రి మొర్రి కథని జీర్ణం చేసుకోలేని అసమర్థత ఒకవైపు. ఏం చెయ్యను. కొన్నాళ్ళు దొండకాయలు గట్టిగా తినాలి కాబోలు – భారవి లాగా. కథ మీకు తెలియకపోతే నాకు ఇంకో టపాకి సరుకు దొరికినట్టే.