సుమారొక పది సంవత్సరాల క్రితం శృతిలయలు సినిమాలోని ‘ఇన్ని రాశులయునికి’ అన్న కీర్తనని వింటుంటే ఒక ఆలోచన కలిగింది. ఇవాళ ఆ పాట వింటుంటే మళ్ళీ ఆ పాత ఆలోచన గుర్తు వచ్చింది.

ఈ పాటలో రాశుల పేర్లన్నీ వస్తాయి. కానీ ఒక క్రమ పద్ధతిలో రావు. రాశిచక్రంలో రాశుల క్రమం ఇలా ఉంటుంది -

మేషం, వృషభం, మిథునం, కర్కాటకం, సింహం, కన్య, తుల, వృశ్చికం, ధనుస్సు, మకరం, కుంభం, మీనం.

అయితే ఈ పాటలో రాశులన్నీ జంటలు జంటలుగా ఈ క్రమంలో వినిపిస్తాయి.

ధనుస్సు-మీనం

కుంభం-సింహం

మకరం-కన్య

తుల-వృశ్చికం

వృషభం-కర్కాటకం

మేషం-మిథునం

ఏ విధంగా చూసినా అన్నమాచార్యుడు ఈ క్రమంలో రాశుల్ని ఎందుకు ఉటంకించాడో అర్థం కాలేదు. అప్పుడు నాకు ఏమనిపించిందంటే, ఈ పాటలో బహుశా ఏదన్నా జ్యోతిష సూత్రమో/రహస్యమో సూచించబడుతోందేమో అని.

కొంచం ఆలోచిస్తే ఈ పాటలో ‘కూటమి కలిగిన రాశులు’, అంటే వివాహాది విషయాల్లో ‘మైత్రి’ (Compatibility) కలిగిన రాశుల గురించి చెప్పబడి ఉండవచ్చు అనిపించింది. బహుశా అన్నమాచార్యులకి తెలిసిన జ్యోతిషం ప్రకారం పైన చెప్పబడిన జంటల్లోని రాశులు ఒకదానికొకటి మైత్రి కలిగినవి అయి ఉండవచ్చు.

మరి ఏదైనా ప్రాచీన జ్యోతిష గ్రంధంలో కూడా ఇదే క్రమంలో రాశుల మధ్య మైత్రి చెప్పబడి ఉన్నదేమో నాకు తెలియదు. పెద్దలెవర్నైనా కనుక్కోవాలి. బ్లాగు మిత్రులకెరికైనా తెలిస్తే కొంచం చెప్పండి.