ఇవాళ నా బ్లాగు మొదటి పుట్టినరోజు. ఇంతవరకు 88 టపాలు రాశాను. (దీనితో కలిపి 89.) వచ్చిన కామెంట్లు 525.

గత సంవత్సరంలో నాకు ఎంతో సంతోషం కలిగించిన విషయాల్లో బ్లాగు రాయడం ఒకటి. కొందరు మంచి మిత్రుల్ని సంపాదించుకోవడం, కొత్త విషయాలు ఎన్నో తెలుసుకోవడం జరిగింది. కొందరు మిత్రుల బ్లాగుల నుంచి ఎంతో స్ఫూర్తి పొందడం కూడా జరిగింది.

బ్లాగు రాయాలని అంతకు ముందు ఒకటి రెండేళ్ళుగా కోరిక ఉన్నా, బద్ధకిస్తూనే కాలం గడిపేశాను. గత ఏడాది ఇదే రోజు హఠాత్తుగా ఆఫీసులో ఒక బలహీన క్షణంలో, ఆవేశంతో బ్లాగు ప్రారంభించెయ్యడం జరిగింది. అయితే అప్పటికి కూడలి గురించి గానీ, మిగతా తెలుగు బ్లాగుల గురించి కానీ తెలియదు. బ్లాగు ఇంగ్లీషులోనే రాద్దామనుకున్నాను. అయితే బ్లాగుల గురించి గూగిలిస్తూ పోతే తెలుగు బ్లాగుల విషయాలు తెలిశాయి. లేఖిని ఉపయోగించి తెలుగులో రాయడం మొదలెట్టా. తర్వాత నా బ్లాగుని కూడలిలో చేర్చాక అందరితోనూ మెల్లగా పరిచయం అయింది.

బ్లాగు రాయక మునుపు నా మనసులో మెదిలే ఆలోచనలు వ్యక్తం చెయ్యడానికీ, సహృదయులతో చర్చించడానికీ అవకాశం లేక ప్రవాస జీవితం చాలా ఒంటరిగానే అనిపించేది. ఇప్పుడా లోటు చాలామటుకు తీరింది. కొన్ని కొన్ని టపాలకి మిత్రుల కామెంట్లు చూస్తే ఎంతో ఉత్సాహం కలుగుతుంటుంది.

కొత్తపాళీగారి ప్రేరణతో ఎన్నో సంవత్సరాలుగా జ్యోతిషం గురించి పేరుకుపోయిన ఆలోచనలన్నిటినీ ఒక క్రమంలో పెట్టుకుని ఈమాట జాలపత్రికలో నాలుగు వ్యాసాలుగా రాయడం గొప్ప అనుభవం. నేను రాసిన మొదటి సీరియస్ రచన అది. (సీరియస్ రచనగా దాన్ని భావించచ్చో లేదో నాకింకా అనుమానమే). దానివల్ల కలిగిన పరిచయాలు ఎంతో విలువైనవీ, ఎన్నటికీ మరువలేనివి.

రాసిన టపాలన్నీ సంతృప్తినే ఇచ్చాయి. ఒకటి రెండు టపాలు రాసి ఉండాల్సింది కాదనీ, కొన్ని చర్చల్లో తలదూర్చకుండా ఉండి ఉంటే బాగుండేదనీ అనిపించినా, వాటివల్ల కూడా ఎంతో నేర్చుకోవడం జరిగింది. ఎవరైనా మిత్రుల్ని నేను నొప్పించి ఉంటే మాత్రం మళ్ళీ క్షమాపణలు తెలియజేసుకుంటున్నా.

నేను చాలా బద్ధకస్తుణ్ణి. గత ఏడాది ఇదే రోజు ఎన్నుకున్న బ్లాగు టెంప్లేట్ ని ఇంతవరకూ మార్చలేదు. మార్చాలని కోరిక ఉన్నా బద్ధకం. టపాల్ని ఇంకా సరిగ్గా ఆర్గనైజ్ చెయ్యాలి. దానికీ  బద్ధకమే. రాయాల్సిన విషయాలు ఎన్నో ఉన్నాయి. సీరియస్ రచనలు కూడా చెయ్యాలి. టైము లేదని వంక పెట్టుకుంటూ కాలం గడిపేస్తుంటాను.

వచ్చే ఏడాది ఇంకా బాగా రాయడానికి కృషి చెయ్యాలనీ, బ్లాగు మిత్రుల్లో వీలైనంతమందిని వ్యక్తిగతంగా కలుసుకోవాలనీ, ఇంకా ఎన్నో ఆసక్తికరమైన విషయాలు తెలుసుకోవాలనీ, చదవాలనీ ఆశిస్తున్నాను. మీ అందరి ఆదరాభిమానాలూ నాకెంతో ఉత్సాహాన్నీ, తృప్తినీ, సంతోషాన్నీ ఇచ్చాయి. అందుకు సర్వదా కృతజ్ఞుణ్ణి.

సంసార కటు వృక్షస్య ద్వే ఫలే హ్యమృతోపమే,

సుభాషిత రసాస్వాద: సంగతి: సుజనే జనే ||