కైలాస పర్వతం




గత్వా చోర్ధ్వం దశముఖ భుజోచ్ఛ్వాసిత ప్రస్థ సంధే:

కైలాసస్య త్రిదశవనితా దర్పణస్యాతిథి: స్యా:

శృంగోచ్ఛ్రాయై: కుముద విశదైర్యో వితత్య స్థిత: ఖం

రాశీభూత: ప్రతిదినమివ త్ర్యంబకస్యాట్టహాస: ||



‘ఇంకొంచం పైకి వెడితే, అక్కడ ఏం కనిపిస్తుందో తెలుసా? కైలాస పర్వతం. దానికి అతిథిగా వెళ్ళు.

దశకంఠ రావణుడు తన భుజాలతో పైకెత్తడానికి ప్రయత్నించడం వల్ల ఆ పర్వతం యొక్క మూలాలన్నీ కదిలిపోయాయి.

అది ఆకాశంలో వెడుతూ ఉండే దేవతా స్త్రీలు తమ ముఖాల్ని చూసుకునే అద్దంలాగా స్వచ్ఛంగా ఉంటుంది.

ఎత్తైన శృంగాలతో ఆకాశంలోకి విచ్చుకున్న కలువ పువ్వులాగా ఉంటుంది.

పరమశివుడు చేసే అట్టహాసాల్ని ప్రతిరోజూ రాశిగా పోస్తే ఈ పర్వతం తయారైందా అనిపిస్తుంది.’




అనువాదంలో కాళిదాసు కవిత్వం కొంత, నా పైత్యం కొంత అనిపిస్తే, మీ తప్పు కాదు.

కార్తీకమాసం. కార్తీక పూర్ణిమనాడే కాళిదాసు జయంతి కూడా అనుకుంటాను. ఆ సమయంలో ఏదన్నా టపా రాద్దామనుకున్నా గానీ, కుదర్లేదు.

ఇంతకీ ఈ శ్లోకం మేఘదూతం లోదనీ, యక్షుడు మేఘాన్ని ఉద్దేశించి అలకాపట్టణానికి దారి చెప్తూ, దారి మధ్యలో కైలాసాన్ని వర్ణిస్తున్నాడనీ ప్రత్యేకంగా చెప్పాలంటారా?